Буғдой! Бу тиллоранг мўъжизада қанча
қуёш нури, замин ҳарорати, деҳқон меҳнати мужассамлашганини ўлчаш қийин. Табиат буғдой бошоғини жуда мукаммал қилиб яратган. Ҳар
бир дон алоҳида либосга ўралган, улар тартиб билан, симметрик ҳолда жойлашган,
паррандаларга ем бўлмаслик учун найзасимон қилтиқлар билан таъминланган.
Инсон қўлига иш қуроли тутгандан кейин
биринчи бўлиб буғдойни маданийлаштирган бўлса ажаб эмас. Бунга неча аср
бўлганини ҳеч ким айтолмайди. Археологлар топган далил-ашёларга қараганда,
ироқликлар олти минг йил муқаддам ҳам ғаллачилик билан шуғулланишган экан. Йўқ,
буни буғдой дунёга келган сана деб билмаслик керак.
Нон – табаррук неъмат. У бугун
миллиардлаб одамнинг насибаси. Бир килограмм буғдой нони 2000 калория қувватга
эга. Унинг таркибида ҳужайра ҳаётининг муҳим омили бўлган оқсил, углекислоталар
бор.
